کونړ کې بېوزلو کورنیو ته وزې، د څارویو خوراکه او درمل ووېشل شوه

۲ غویی ۱۴۰۴ ه‍.ش
۲۴ شَوّالُ المُکَرَّم ۱۴۴۶ه‍.ق
د کرنې، اوبو لګولو او مالدارۍ ریاست په هڅو، د خوړو نړیوال پروګرام ډبلیو اف پي په مالي ملاتړ او د شپول مؤسسې په تخنیکي همکارۍ، د وټپور، غازي‌آباد او مرکز په ګډون درېیو سیمو کې، ۶۰ بېوزلو او اړمنو کورنیو ته د مرستې یوه پروژه پلې شوه.
د دې مرستې له مخې، هرې کورنۍ ته دوه محلي وزې، ۱۰۰ کیلو ګرامه حیواني متراکمه خوراکه او ۲۰۰ ملي لیتره د جینجیو ضد درمل ورکړل شول.
د یادې پروژې موخه د بېوزلو کورنیو اقتصادي وضعیت پیاوړي کول، د مالدارۍ د ودې له لارې د هغوی د عاید سرچینې زیاتول، او د خوړو خوندیتوب ته وده ورکول دي.
د افغانستان په غرنیو سیمو کې، بېوزلې کورنۍ له جدي اقتصادي ستونزو سره مخ دي، چې د مالدارۍ وړې پروژې کولای شي د هغوی د ژوند کیفیت ښه کړي.