درېیو ولایتونو کې پر زرګونو کورنیو ۲۵۰ ټنه غنم وېشل کېږي

  ۱ غویی ۱۴۰۴ ه‍.ش
۲۳ شَوّالُ المُکَرَّم ۱۴۴۶ه‍.ق
د افغانستان ا.ا.ا زعیم، عالیقدر امیرالمؤمنین شیخ هبت‌الله آخندزاده حفظه‌الله تعالی ورعاه، د حکم له مخې د کرنې، اوبو لګولو او مالدارۍ ریاست په رهبرۍ د کندهار ولایت د مقام تر څارنې لاندې، د کندهار، اروزګان او زابل ولایتونو زرګونو بېوزلو، زیانمنو او له طبیعي پېښو اغېزمنو شویو کورنیو سره د ۲۵۰ ټنه غنمو مرسته کېږي.
یاد غنم به هغو کورنیو ته ووېشل شي، چې سږ کال د طبیعي پېښو له امله زیانمنې شوي دي. له دغې مرستې څخه ۱۰۰ ټنه د کندهار، ۱۰۰ ټنه د اروزګان او ۵۰ ټنه د زابل ولایت لپاره ځانګړې شوي، چې له مخې به یې زرګونه بېوزله او اړمنې کورنۍ برخه‌منې شي او د هغوی د خوراک لومړنۍ اړتیاوې به پوره شي.
د دغو غنمو د وېش موخه د ولس هوساینه، د بېوزلو او زیانمنو کورنیو ملاتړ او د بشري مرستو تأمین دی.
د چارواکو په خبره دا ډول اقدامات نه یوازې د بیړنیو اړتیاوو د پوره کولو لپاره ارزښت لري، بلکې دا پیغام هم رسوي چې ا.ا.ا د خپل ولس ترڅنګ، د هرې سختۍ پر مهال ولاړ دی.