کندهار کې پر سلګونو بزګرانو د پنبې اصلاح شویو تخمونو او کیمیاوي سرو وېشل
۳۰ وری ۱۴۰۴ ه.ش
۲۱ شَوّالُ المُکَرَّم ۱۴۴۶ه.ق
د کندهار د کرنې، اوبو لګولو او مالدارۍ ریاست په همغږۍ له جرمونو او مخدره توکو سره د ملګرو ملتونو د مبارزې دفتر (یو. ان. او. ډې. سي) په مالي او د هالنډ کمېټې په تخنیکي همکارۍ، د کندهار په ارغستان، شاولیکوټ او غورک ولسوالیو کې پر ۳۰۰ بېوزله بزګرانو د پنبې«کالکۍ» اصلاح شویو تخمونو او کیمیاوي وېش لړۍ پیل شو.
په یاده مرسته د ارغستان، شاولیکوټ او غورک ولسوالیو سلګونه بیوزله بزګران شامل دي. چې لمخې هر بزګر ته ۱۰ کیلو د کالکۍ اصلاح سوې تخم، همداراز د یاد فصل د ښه ودې په موخه هر بزګر ته ۵۰ کیلو توره سره او ۵۰ کیلو ګرامه سپنه سره وېشل کېږي، ترڅو د روان فصل لپاره د کالکو کرنه په ښه ډول ترسره کړي.
د دې مرستې ترڅنګ، بزګرانو ته د کالکو د معیاري او غوره میتودونو په اړه روزنه هم ورکول کېږي، ترڅو د روان فصل په جریان کې یې کرنه مؤثره او حاصلات یې ډېرشي. د دې مرستې موخه د اړمنو بزګرانو مالي ملاتړ، د اصلاح شویو تخمونو ته پراختیا ورکول، د میکانیزه کرنې دودول، د کرنیزو حاصلاتو لوړول، او بزګرانو ته د کاري فرصتونه برابرول دي.
د یادونې وړ ده، چې د کندهار کرنې، اوبو لګولو او مالدارۍ ریاست په هڅو، له جرمونو او مخدره توکو سره د ملګرو ملتونو د مبارزې دفتر (یو. ان. او. ډې. سي) په مالي ملاتړ دوې اوونې وړاندې هم د یادې مرستي ترڅنګ د سلګونو بیوزلو او اړمنو بزګرانو ته د لوبیا او سبو تخمونه او کیمیاوي سرې ویشلي او ۴۰ تنه بڼوالو ته یې د پستې بڼونه جوړ کړي دي، ترڅو په لرو پرتو سیمو کې کروندګرو ته د کرنې اړیني چوپړتیاوي برابري شي.
