خوست ولایت کې د چیک ډیمونو د جوړېدو له چارو څخه څارنه وشوه
د خوست ولایت په ځاځي میدان، باک، صبريو او یعقوبیو ولسوالیو کې د اف اې او په مالي ملاتړ د جوړېدونکو چیک ډیمونو د ساختماني چارو څخه د کرنې ریاست انجینرانو تخنیکي نظارت ترسره کړ. مسوولینو ساختماني شرکتونو ته لارښونه وکړه چې چارې باید د انجینري اصولو او نقشو مطابق پرمخ یوسي.
د خوست ولایت د کرنې، اوبو لګولو او مالدارۍ ریاست د طبیعي سرچینو آمریت اړوند تخنیکي انجینرانو د ملګرو ملتونو د خوړو او کرنې سازمان اف اې او له خوا د جوړېدونکو چیک ډیمونو د ساختماني چارو څخه نظارت ترسره کړ.
یاد نظارت د ځاځي میدان، باک، صبريو او یعقوبیو ولسوالیو په اړوندو سیمو کې ترسره شو، چې موخه یې د چیک ډیمونو د کیفیت ارزونه، د کار د پرمختګ څارنه او د انجینري معیارونو رعایت وو.
په یاد ولایت کې د اف اې او په همکارۍ شپږ چیک ډیمونه جوړېږي او د کرنې ریاست انجینرانو د ساختماني چارو د ارزونې پر مهال قراردادي شرکت ته لارښوونه وکړه چې کارونه باید د نقشې، بې کیو او انجینري اصولو سره سم ترسره شي.
همداراز، ټینګار وشو چې د پي سي سي کانکریټ لپاره کارېدونکي ساختماني مواد باید له هر ډول عضوي موادو او خاورې پاک وي او ټولې چارې باید د تجربهکارو کاریګرو په وسیله د ورکړل شوو مارکونو مطابق پر مخ یوسې.
په ځینو برخو کې نیمګړتیاوې هم مشاهده شوې، چې اړوند شرکت ته د اصلاح سپارښتنې وشوې، ترڅو د کارونو د ځنډ او خنډ مخنیوی وشي.
چیک ډیمونه د بارانونو د اوبو د مهار، د خاورې د فرسایش د مخنیوي او د ځمکې د زرغونتیا لپاره مهمې پروژې دي. د دې ډول پروژو اغېزمنتوب په تخنیکي تطبیق او لوړ کیفیت پورې تړلی دی، چې له همدې امله یې دوامداره نظارت اړین بلل کېږي.
