د ننګرهار وادې کرنیز شرکت د کرنیزو او تخنیکي چارو د پرمختګ په موخه کاري غونډه وشوه
۲۰ وری ۱۴۰۴ ه.ش
۱۱ شَوّالُ المُکَرَّم ۱۴۴۶ه.ق
د کرنیزو او تخنیکي چارو رییس انجینر حکمت الله معروف د څلورګونو فارمونو د امرینو او عمومي مدیرانو سره کاري ناسته وکړه، چې پکې د کرنیزو چارو د لا پرمختګ او همغږۍ پر اړینو موضوعاتو بحث وشو.
په دې ناسته کې چې موخه یې د هېواد او په ځانګړې توګه د ننګرهار وادي کرنیز امارتي شرکت پرمختګ و، ګډونوالو د کار د موثریت پر زیاتولو، پلان جوړونې، فعالیتونو د منظم پرمخ بېولو، د کاغذي کارونو د کمولو، د ادارې د سلسله مراتبو رعایت او موجوده ستونزو د حل پر لارو چارو مفصل بحث وکړ.
ښاغلي معروف د یادو موضوعاتو ترڅنګ د اغېزناکو او همغږو اقداماتو پر اړتیا ټینګار وکړ. ګډونوالو هر یوه خپل نظرونه، وړاندیزونه او ستونزې له رئیس سره شریکې کړې او ژمنه یې وکړه چې د لا غوره خدمتونو لپاره به هڅې زیاتوي. په پای کې اړینې پرېکړې او سپارښتنې هم وشوې.
د یادونې وړ ده، چې انجینر حکمت الله معروف شاوخوا ۱۵ ورځې وړاندې د ننګرهار وادي کرنیز امارتي شرکت د کرنیزو چارو د رئیس په توګه خپل کار پیل کړی دی.
