د هلمند ګرشک کې کروندګرو ته ۱۶ شنې خونې جوړیږي
۲۰ وری ۱۴۰۴ ه.ش
۱۱ شَوّالُ المُکَرَّم ۱۴۴۶ه.ق
د هلمند د کرنې، اوبو لګولو او مالدارۍ ریاست چارواکي وایي، چې د دې ولایت د ګرشک په ولسوالی کې کروندګرو ته ۱۶ شنې خونې جوړېږي.
دغه شنې خونې د ملګرو ملتونو د پراختیايي ادارې په همکارۍ ۱۶ بزګرانو ته جوړېږي، چې د جوړولو په پار یې پر یادو بزګرانو د شنوخونو اړین توکي لکه لمریزه تخته، د اوبوټانکۍ، د اوبو پمپ او نور اړین توکي وېشل شوي دي.
د هلمند دکرنې ریاست چارواکي وایي، چې په هلمند کې د کرکېلې لپاره د شنو خونو له جوړېدو سره سم د بزګرو کار غوړېدلی او د شنو خونو په جوړېدو سره د سبو کرکېلې نوې بڼه خپله کړې چې بزګرانو هم له نویو هیلو سره دغه کار ته مخه کړې ده. د دوی په خبره شنې خونې بزګرو ته ښه عاید لري.
دوى وايي، د شنو خونو په پراختيا سره کولای شي چې د هېواد یو شمېر نورو ولایتونو ته هم وخت په وخت كرنيز توکي ورسوي.
د هلمند د کرنې، اوبو لګولو او مالدارۍ ریاست چارواکي وایي، دوی په دې ولایت کې د کرنیزو حاصلاتو د لوړولو او د موسمي نباتاتو د کرکېلي د پراختیا په پار هلې ځلې کوي او د شنو خونو د حاصلاتو ښې پایلې دوی هڅولي چې د شنو خونو د جوړولو لړۍ نوره هم پیاوړې او ګړندۍ کړي.
