خوست ولایت کې د نن نیالګی، راتلونکي هوساینه تر سرلیک لاندې د چارمغزو نیالګي ووېشل شول

۱۳ وری ۱۴۰۴ ه‍.ش
۴ شَوّالُ المُکَرَّم ۱۴۴۶ه‍.ق
د خوست ولایت کرنې، اوبو لګولو او مالدارۍ ریاست د موسی خیلو ولسوالۍ کرنیزو چارو عمومي مدیریت تر څارنې لاندې، د او آر سي ډي مؤسسې په همکارۍ، ۲۵۲ مستحقو بڼوالو ته د چارمغزو نیالګي ووېشل.  
د نن نیالګی، راتلونکي هوساینه تر عنوان لاندې، د موسی خیلو ولسوالۍ ۲۵۲ بڼوالو ته لس، لس دانې د چارمغزو نیالګي ورکړل شول. دا پروګرام د کرنې ریاست او او آر سي ډي مؤسسې د ګډو هڅو پایله ده، چې موخه یې د بڼوالۍ وده، شنه چاپېریال ته وده ورکول او د بزګرانو اقتصادي پیاوړتیا ده.  
مسوولین وایي، د نیالګیو وېش به نه یوازې د بڼوالۍ سکتور پیاوړی کړي، بلکې د بزګرانو لپاره به د راتلونکې دوامداره عوایدو سرچینه هم وي. دا ډول پروګرامونه د کرنې ودې، شنه چاپېریال پراختیا او د بزګرانو ملاتړ لپاره ځانګړی ارزښت لري.