پکتیا کې یوشمېر بڼوالو ته د مڼو نوي بڼوڼه جوړېږي
د پکتیا د کرنې، اوبولګولو او مالدارۍ ریاست چارواکي وایي، چې ددې ولایت، د مرکز ګردیز په ګډون د زرمت او احمدابا په ولسوالیو کې د اکشن اېډ مؤسسې په همکارۍ، چې مالي ملاتړ یې د مخدره توکو او جرمونو سره د ملګرو ملتونو د مبارزې دفتر «یو، ان، او، ډی، سي» پر غاړه لري، ۲۰۵ بزګرانو ته د مڼو بڼونو جوړولو په پار اړین توکي ووېشل شول.
د پکتیا د کرنې، اوبولګولو او مالدارۍ ریاست اړوند د کرنیزو چارو عمومي مدیر انجینر عزیزالله کریمي وویل، چې د اکشن اېډ موسسې په همکارۍ د دې ولایت د مرکز په ګډون د زرمت او احمدابا په ولسوالیو کې ۲۰۵ تنه بزګرانو ته د مڼو بڼونو جوړولو په پار د مڼو نیالګي او اړین توکي وېشل شوي دي.
همداراز ښاغلی هاشمي وویل، چې هر بزګر ته ۷۲ د مڼو نیالګي، ۲۵ کیلوګرامه لوبیا، ۲۵ کیلوګرامه توره سره، ۵۰ کیلوګرامه سپینه سره او یوه اندازه د نباتاتو د ناروغیو او آفتونو درمل ورکول کېږي.
په همدې حال کې د پکتیا دکرنې ریاست تخنیکي ټیم له خوا دغو بزګرانو ته د بڼونو د جوړولو او اوبو لګولو اړوند ضروري معلومات هم ورکړل شول، ترڅو د نیالګیو د ښې ودې او حاصل زیاتوالي ته زمینه برابره شي.
