ننګرهار کې یوشمېر بڼوالو ته د ناکو او آلوچو متراکمو بڼونه جوړېږي
د ننګرهار د کرنې، اوبو لګولو او مالدارۍ ریاست په هڅو د اکشن آیډ مؤسسې په تخنیکي همکارۍ او د ملګرو ملتونو د خوړو او کرنې ادارې په مالي لګښت د ننګرهار په خوږیاڼو او کوزکونړ ولسوالېو کې ۱۷ تڼو بڼوالو ته د آلوچو او ناکو ۱۱ زره او ۹۰۰ نیالګیو کېنول شول.
ننګرهار د کرنې، اوبو لګولو او مالدارۍ رییس مولوي محمد ولي محسن وویل، چې یاد بڼونه د نشه یي توکو بدیلو پروګرامونو له لارې پلي کېږي او هڅه کوي د نشه یي توکو مخنیوي په موخه لوړ حاصل ورکوونکي (متراکم ) نور بڼونه هم جوړ کړي.
نوموړې وویل، چې هر بڼوال ته ۷۰۰ نیالګي ورکړل شوي او په نږدې راتلوونکي کې په یادو بڼونو کې د پایو او لینونو نصبولو چارې هم پیل شي.
دغه راز یادو ۱۷ تنو بڼوالو ته په بڼونو د کرنیزو عملیو ترسره کولو، اوبو لګولو، سرې استعمال، هرزه وښو کنټرول او نورو اړونده برخو کې عملي او نظري روزنه هم ورکړل شوې ده او په راتلوونکي کې به هم د حاصل ټولولو، بسته بندۍ، سورت بندۍ او نورو برخو کې روزنه ورکړل شي.
