د ننګرهار اچین ولسوالی کې پر اړمنو بزګرانو نغدې مرسته ووېشل شوه
د ننګرهار د کرنې، اوبو لګولو او مالدارۍ ریاست سره په همغږۍ دافغانستان کلیو بیا ودانولو مؤسسې«آر،آر،اې،اې» په تخنیکي همکارۍ او کورډیډ په مالي لګښت د ننګرهار د اچین ولسوالی پر ۸۹ بزګرانو دیو میلیونه او ۱۲۱ زره او ۴۰۰ افغانیو په ارزښت نغدي مرسته ووېشل شوه.
د ننګرهار د کرنې، اوبو لګولو او مالدارۍ ریاست د احصایي او معلوماتو د تنظیم امر قاري سېلاب ذکریا وویل، چې په اچین ولسوالی کې ۸۹ هغو بېوزله او ناچاره بزګرانو او مالدارانو سره، چې ځمکه یې کمه او د ګټې وټې بل مدرک یې نه درلوده مرسته وشوه.
ښاغلي ذکریا زیاته کړه، چې هر بزګر ته ۱۲ زره او ۶۰۰ افغانۍ نغده مرسته ورکړل شوه.
د افغانستان دکلیو بیا ودانولو اداري مسؤل حاج محمد صالحي وویل، چې د یادو پیسو د وېش موخه د بزګرانو لاسنېوي او د خوړو خوندیتوب رامنځته کول دي.
نوموړي وویل، چې په راتلوونکي به نورو بېوزله کورنیو سره هم مرسته ترسره کړي.
