هلمند کې د زېرمه شویو غنمو څارنه دوام لري 

۴ وری ۱۴۰۴ ه‍.ش
۲۴ رَمَضانُ المُبارَک ۱۴۴۶ه‍.ق
د هلمند ولایت د کرنې، اوبولګولو او مالدارۍ ریاست د لارښوونې له مخې، یو ګډ پلاوی د مرکز لښکرګاه په درېیوو زېرمتونونو کې د زېرمه شویو غنمو د وضعیت څارنه کوي او د ساتنې لپاره لازم اقدامات ترسره کوي.
د دې پروسې پر بنسټ، یاد پلاوی په اونۍ کې دوه تر درېیو ځله ګدامونو ته ورځي، د هغوی په حضور کې زېرمتونونه خلاصېږي، د پاکوالي ارزونه کېږي، د خزندو او حشراتو مخنیوي لپاره د اړتیا په صورت کې درمل کارول کېږي او د غنمو هر اړخیزه ارزونه ترسره کېږي. تر دې وروسته، زېرمتونونه بېرته مهرلاک کېږي.
د کرنې، اوبولګولو او مالدارۍ رئیس الحاج مولوي نیازمحمد وهاج مؤظف پلاوي ته سپارښتنه کړې، چې د زېرمه شویو غنمو د ساتنې لپاره جدي هڅې وکړي.
د یادونې وړ ده، چې د ا.ا.ا زعیم، امیرالمؤمنین (حفظه الله تعالی) د حکم له مخې، په هلمند کې ۵زره او ۸۶۸ ټنه اضافي غنم پېرل شوي، چې له ډلې یې یوزره او ۶۳۲ ټنه په هلمند کې ساتل شوي او ۴زره او ۲۳۶ ټنه کابل (مرکزي سیلو) ته لیږدول شوي دي.