د کندهار پنجوایي ولسوالی کې لسګونو بزګرانو ته د املوک بڼونه جوړ شول
۲۶ کب ۱۴۰۳ه.ش
۱۶ رَمَضانُ المُبارَک ۱۴۴۶ه.ق
د کندهار د کرنې، اوبو لګولو او مالدارۍ ریاست په هڅه، د ملګرو ملتونو د خوراک او کرنې سازمان په مالي ملاتړ، د بشري خیریه مؤسسې په تخنیکي همکارۍ او د کرنیزو چارو آمریت تر څارنې لاندې، په پنجوایي ولسوالۍ کې ۵۰ اړمنو بڼوالو ته پر ۵۰ جریبه ځمکه د املوک بڼونه جوړ او هر بزګر ته د املوک نیالګي وویشل شول.
یاد بڼونه د مسلکي انجنیرانو له لوري په بېلابېلو سیمو کې جوړ شوي، چې له مخې یې هر بزګر ته پر یوه جریب ځمکه د ۱۳۴ نیالګیو څخه د املوک بڼ ترتیب شوی دی.
د بڼونو د جوړېدو څخه وړاندې، بڼوالو ته د املوک بڼ جوړونې عملي او نظري روزنه ورکړل شوې وه، چې په دې روزنه کې د ځمکې چمتووالی، د نیالګیو منظم ایښودل، د کتارونو ترمنځ د مناسب واټن پرېښودل، د اوبو د مدیریت سیستم رامنځته کول او اړینې سپارښتنې شاملې وې، ترڅو بڼونه په ښه توګه وده وکړي.
د دې بڼونو جوړولو موخه د بزګرانو اقتصادي ملاتړ، د املوک بڼونو پراختیا، د بزګرانو ځان بسیاینه او د هغوی لپاره د کار زمینې برابرول دي.
د یادونې وړ ده چې تېره ورځ هم په معروف ولسوالۍ کې ۱۰ اړمنو بزګرانو ته د انګور بڼونو د جوړولو لپاره شاوخوا ۱۰زره نیالګي وېشل شوي وو، ترڅو د بڼوالو اقتصادي وضعیت ښه شي او په یادو ولسوالیو کې د بېلابېلو مېوو کښت ته زمینه برابره شي.
