ننګرهار وادي کرنیز امارتي شرکت د پالونیا کښت پیل کړ
۲۳ کب ۱۴۰۳ه.ش
۱۳ رَمَضانُ المُبارَک ۱۴۴۶ه.ق
د ننګرهار وادي کرنیز امارتي شرکت په لومړي ځل د خپلو څلورګونو فارمونو په ځمکو کې د پالونیا بوټو کښت پیل کړ. د دې پروسې د پیل په مراسمو کې د شرکت عمومي رئیس سیدمحمد نعیم «محمدي»، د فارمونو امرین، د کرنې او قوریو عمومي مدیران، او ځیني نور مسؤلین حاضر وو. دوی د پالونیا بوټو د کښت د پیل لپاره یو، یو بوټی وکاره.
د ننګرهار وادي کرنیز امارتي شرکت عمومي رئیس وویل: چې د پالونیا ونه، چې چټکه وده کوي، د لوړ کیفیت لرګیو د تولید او د چاپېریال ساتنې له مخې ځانګړی ارزښت لري. نوموړي زیاته کړه چې دا شرکت په لومړي ځل ۲۰۰ د پالونیا بوټي کري، چې د هوپ شرکت لهخوا د ډالۍ په توګه ورکړل شوي دي.
ښاغلي محمدي د دې پروژې د موخې په اړه وویل: «دا بوټي د ځمکې د اغېزمنې استفادې، د شرکت او سیمهییزو خلکو د عاید لوړولو او د چاپېریال ساتنې لپاره کرل کېږي. پالونیا ونه د خپلې چټکې ودې او د لرګیو د لوړ کیفیت له امله نړیوال شهرت لري، او د کاربن ډای اکساید جذبولو، د خاورې د سطحي ساتنې او حاصلخیزۍ لوړولو کې مرسته کوي.»
د ننګرهار وادي کرنیز امارتي شرکت مسؤلینو دا ګام د ننګرهار کانال د کرنیز نوښت یوه مهمه برخه وبلله. دوی زیاته کړه چې دا پروژه به نه یوازې اقتصادي وده پیاوړې کړي، بلکې په چاپېریال ساتنې کې به هم رغنده رول ولري.
د شرکت مسؤلین وايي، د پالونیا بوټو له کښت سره به د دې ونو قلمې هم ترلاسه شي، چې د کښت د پراختیا لپاره به وکارول شي. دا به په راتلونکي کې د پالونیا د نورو بڼونو د پراخولو زمینه هم برابره کړي.
د سیمې کرنیز متخصصین او عام خلک د ننګرهار وادي کرنیز امارتي شرکت دا اقدام ستایي، ځکه چې د ننګرهار کانال ځمکې د پالونیا د کښت لپاره مناسبه سیمه ګڼل کېږي.
عام باور دا دی چې پالونیا ونه د چټکې ودې، لږې اوبو اړتیا او د باکیفیته لرګیو د تولید له امله د سیمې کرنیز سکتور ته ګټه رسوي. د دې بوټو کښت به د بیکارۍ د کچې کمولو، د کروندګرو د عاید لوړولو او د ځمکې د حاصلخیزۍ د زیاتوالي لامل شي.
