د لغمان دکرنې رییس د اکشن اېډ مؤسسې له چارواکو سره وکتل
۲۳ کب ۱۴۰۳ه.ش
۱۳ رَمَضانُ المُبارَک ۱۴۴۶ه.ق
دلغمان کرنې، اوبولګولو او مالدارۍ رییس مولوي عبدالستار محمد د خپل کار په دفتر کې داکشن اېډ مؤسسې د پروژو مسؤل هندي سریکانتا میسرا، دیادې مؤسسې دختیځ زون مسؤل خلیلزي، د سي بارډ ال پروژې مسؤل ګل ویس وزیر او د انجینري څانګې مسؤل ښایسته ګل معروفي سره وکتل.
په یاده کتنه کې د لغمان دکرنې رییس مولوي عبدالستارمحمد راغلي پلاوی ته د ښه راغلاست ترڅنګ په دې ولایت کې داکشن اېډ مؤسسې ترسره شویو پروژو کارونه ښه وارزول او له یاد پلاوی څخه یې وغوښتل، چې د لغمان ولایت د مرکز اړوند تومان بند پروژې کارونه اوس مهال تعلیق حالت کې دي، چې یاد بند د ولسونو لپاره ډېره اړینه پروژه ده په همدې موخه باید رغنیزې چارې یې بیا پیل شي.
مولوی عبدالستار محمد وویل، چې د لغمان ډېری وګړي بې وزله او کمې ځمکې لري، په همدې موخه ډېرو مرستو او همکارۍ ته اړتیا لري. هغه زیاته کړه، چې ددې ولایت له بزګرانو سره باید د اصلاح شویو تخمونو، کیمیاوي سرو، سربندونو جوړولو، د اوبولګولو سیسټمونو جوړولو او د میکانیزه کرکیلې په برخه کې مرستې او هکارۍ ترسره شي، ترڅو دوی له کمې ځمکې څخه ډېر حاصلات ترلاسه کړي.
په همدې حال کې د اکشن اېډ مؤسسې د پروژو مسؤل هندي سریکانتا میسرا وویل، چې ددې لیدنې څخه یې موخه غوره همغږۍ رامنځته کول او دهغو پروژو چارې بیاپیلول دي، چې کارونه یې ځنډول شوي دي. ښاغلي میسرا د کرنې ریاست مشرتابه ته ډاډ ورکړ چې په یادو برخو کې به دکرنې ریاست غوښتنو ته رسېدنه کوي.
