خوست کې د زیتونو حاصلاتو زیاتوالي په پار هڅې؛ د زیتونو سلګونه نیالګې کښېنول کېږي

د خوست دکرنې، اوبولګولو او مالدارۍ ریاست چارواکي وایي، چې په دې ولایت کې د زیتونو حاصلاتو د زیاتوالي په پارد هلو ځلو په دوام د یاد ریاست له خوا ددې ولایت د شیخ زاید پوهنتون سره د زیتونو ۸۰۰ نیالګیو مرسته وشوه.
د خوست دکرنې ریاست چارواکي وایي، چې د زیتونو یاد اصلاح شوي نیالګي د شیخ زاید پوهنتون په سیمه کې کښېنول کېږي، چې موخه یې د پوهنتون د چاپېریال سمسورتیا او په ټوله کې د زیتونو حاصلاتو زیاتوالي ته زمینه برابرول دي.
باید وویل شي، چې څو ورځې وړاندې  د ملګرو ملتونو د خوړو او کرنې ادارې په همکارۍ د خوست ولایت د باک ولسوالی په «سپیرکي، توکاک او کوټکی» کلیو کې د زیتونو نیالګیو کېنولو لړۍ پیل شوه، چې په ترڅ کې به یې ۱۵ زره د زیتونو نیالګي کېنول شي.
خوست دهېواد د هغو ولایتونو په ډله کې دی، چې د زیتونو حاصلات لري او هر کال د دې مېوې د حاصلاتو زیاتوالی په پار هلې ځلې کېږي.د زيتونو تيل نه يوازې د خوراک لپاره مهم دي، بلکې په طبي، درملو، او ښکلايي محصولاتو کې هم کارول کېږي.