د کندهار دامان کې پر لسګونو بېوزله مالدارانو مرستې ووېشل شوې

۱۵ کب ۱۴۰۳ه‍.ش
۵ رَمَضانُ المُبارَک ۱۴۴۶ه‍.ق
د کندهار د کرنې، اوبو لګولو او مالدارۍ ریاست په هڅه، له جرمونو او مخدره توکو سره د ملګرو ملتونو د مبارزې دفتر (یو. ان. او. ډې. سي) په مالي او د هالنډ کمیټې په تخنیکي همکارۍ د دامان ولسوالی پر ۲۰ تنو اړمنو او بېوزله مالدارانو د مالدارۍ اړین توکي او د څارویو روغتیا لپاره درمل ووېشل شول.
ددې مرستې په ترڅ کې هر مالدار ته د مایع ګاز ډبه، شېدو راټولولو لپاره فلزي سطل، د شېدو د انتقال لپاره فلزي ډبه، د شېدو مایع کولو لپاره فلزي لوښی (کټوه)، د شلومبو مایع کولو لپاره فلزي غړکه، جالۍ، لوټه، دست کشې، بورس، او همدارنګه د څارویو روغتیا ته د پاملرنې په موخه ۵ قلمه مختلف درمل ورکړل شوه.
د دې مرستې موخه د مالدارانو اقتصادي ملاتړ، د هغوی لپاره د مالدارۍ اړینې اسانتیاوې برابرول، د هغوی اقتصادي وضعیت ښه کول، او د کورنیو اړتیاوو پوره کول دي، ترڅو مالداران وکولای شي له دې مرستې څخه ګټه پورته او خپل اقتصادي ودې ته زمینه برابره کړي.
د یادونې وړ ده، چې تر دې وړاندې د کندهار په پنجوایې او ډنډ ولسوالیو کې هم د ۴۵ تنه اړمنو مالدارانو سره دې ته ورته مرسته ترسره شوې وه.