ننګرهار کې لسګونه بزګرانو ته د کرنيزو عمليو تر سره کولو په موخه روزنه ورکړل شوه
د ننګرهار د کرنې، اوبو لګولو او مالدارۍ رياست د کرنيزو مدیريتونو کار کوونکو له لوري په لعلپورې، بټي کوټ او سپین غر ولسوالیو کې لسګونو بزګرانو ته د ناروغيو مخنيوي او غوره کرنيزو عمليو تر سره کولو په موخه عملي روزنه ورکړل شوه.
په دغو ولسوالیو کې بزګرانو ته د غنمو او مېوه لرونکو ونو ناروغیو مخنیوی، کرنیزو عملیو، اوبو لګولو، سرې استعمال حاصل ټولولو، هرزه وښو مخنیوي او افاتو د هراړخیز کنټرول په موخه معلومات ورکړل شول .
دغه راز په يادو ولسوالیو کې بزګرانو او بڼوالو ته په بڼونو کې دښاخه برۍ، یوریا سپرې، د ونو د تنو سپینول، د درملو ګټو، زیانونو او ګڼو نورو برخو کې پوهاوی وشو.
د ننګرهار د کرنې، اوبولګولو او مالدارۍ ریاست هڅه کوي، د خپلو متخصصینو پر مټ بزګرانو او بڼوالو ته د ناروغیو او افاتو په اړه پر وخت معلومات وړاندې ترڅو د ناروغیو مخنیوي وشي او بزګران له زیانونو وژغورل شي.
