د کندهار پنجوايي کې د ځنګلي بوټو د ناقانونه انتقال مخه ونیول شوه
۱ کب ۱۴۰۳ه.ش
۲۰ شَعبان المُعَظّم ۱۴۴۶ه.ق
د کندهار د کرنې، اوبو لګولو او مالدارۍ ریاست تر رهبرۍ لاندې، د پنجوايي ولسوالی د ځنګلونو او څړځایونو د ساتنې مسؤل مولوي نعمتالله، د کرنې او مالدارۍ مسؤلینو او د امنیه قوماندانۍ امنیتي مسؤلینو په ګډه د طبیعي، ځنګلي او ریګي بوټو د ساتنې او پرېکولو د مخنیوي لپاره کمپاین ترسره کړه، چې د دې کمپاین په ترڅ کې، د یادې ولسوالی رود منځني سیمه کې د بدوان کلي په سیمه کې د ځنګلي بوټو د ناقانونه انتقال مخه ونیول شوه. مسؤلین وايي، یو تن سیمه ییز اوسیدونکي هڅه کوله چې دغه بوټي په غیرقانوني ډول پرې کړي او وروسته یې انتقال کړي.
د پنجوايي ولسوالی چارواکي زیاتوي، چې د ځنګلونو د ساتنې، پرېکولو د مخنیوي، او عامه پوهاوي لپاره یې څارنیزې هڅې پیاوړې کړي دي. د دې هڅو په لړ کې، د سیمې اوسېدونکو او مالدارانو ته د ځنګلي بوټو د ارزښت، ساتنې او د پرېکولو د زیانونو په اړه پوهاوی ورکړل شوی دی.
نوموړي زیاتوي؛ مسؤلینو د سیمې خلکو ته جدۍ سپارښتنه وکړه، چې د ځنګلونو له پرېکولو ډډه وکړي، ترڅو د طبیعي شتمنیو ارزښت ته متوجه شي او په ساتنه کې فعاله ونډه واخلي. هغوی ټینګار وکړ چې هېڅ ډول ناقانونه فعالیت ته به اجازه ور نه کړي. او د ځنګلي بوټو د ساتنې لپاره به نور اقدامات هم ترسره شي.
د یادونې وړ ده، چې د کرنې ریاست په وروستیو کې د طبیعي بوټو د قاچاق او پرېکولو د مخنیوي لپاره ګڼ شمېر کمپاینونه ترسره کړي دي، چې دوه اوونۍ وړاندې هم په پنجوايي ولسوالی کې د سسي بوټو د ناقانونه انتقال مخه نیول شوې وه.
