کندهار کې د شپږو میاشتو په اوږدو کې ۲۶۲ زره څاروي واکسین شوي
د کندهار د کرنې، اوبو لګولو او مالدارۍ ریاست د پرلهپسې هڅو، د ملګرو ملتونو د خوړو او کرنې ادارې او د اروپایي ټولنې په مالي ملاتړ، د مالدارۍ آمریت تر مستقیمې څارنې لاندې، د کندهار په مرکز او ۱۷ ولسوالیو کې ۲۶۲ زره لوی او کوچني څاروي واکسین شوي دي. دا واکسینونه د تېرو شپږو میاشتو په اوږدو کې د مسلکي پاراوټرانو له لوري تطبیق شوي دي.
په دغو واکسینونو کې ۱۵۰ زره د ملګرو ملتونو د خوړو او کرنې ادارې «اف،اې،او» او ۱۱۲ زره د اروپایي ټولنې په مالي ملاتړ تطبیق شوي دي. یاد واکسینونه د غواګانو د پوستکي «ال،اس،ډي»، د غواګانو د پښو او خولې ناروغۍ «اف،ام،ډي»، د کوچنیو څارویو د طاعون «پي،پي،آر»، د کوچنیو څارویو د چیچک او د کوچنیو څارویو د چنجیو ضد ناروغیو لپاره ورکړل شوي دي.
ددغو واکسینونو موخه د مالدارانو ملاتړ، د څارویو د مړینې کچې کمول، په لیرې پرتو ولسوالیو کې د سالمې مالدارۍ لپاره اړین واکسینونه چمتو کول، او مالدارۍ ته پراختیا ورکول دي.
د یادونې وړ ده، چې په دې وروستیو کې د کندهار د کرنې، اوبو لګولو او مالدارۍ ریاست د مالدارۍ سکتور ته زیاته پاملرنه کړې او هڅه کوي، چې مالدارانو ته اړینې مرستې چمتو کړي. همداراز، د سالمې مالدارۍ د ودې لپاره لازم ګامونه اخلي، چې په پایله کې به د کندهار مالدارۍ لا ښه وده وکړي.
