کندهار کې ۳۰ زره کوچني څاروي د چنجیو ناروغۍ د مخنیوي په موخه واکسین شول
د کندهار د کرنې، اوبولګولو او مالدارۍ ریاست په هڅو، د اروپایي ټولنې په مالي ملاتړ، د هالنډ کمېټې په تخنیکي همکارۍ او د مالدارۍ آمریت تر مستقیمې څارنې لاندې، د کندهار په اوو ولسوالیو کې د چنجیو ضد واکسین کولو کمپاین ترسره شو، چې په ترڅ کې یې ۳۰ زره کوچني څاروي واکسین شول.
یاد واکسین د پنجوایي، نېش، غورک، میوند، سپین بولدک، خاکریز او ارغستان ولسوالیو کې د څهباندې یوې میاشتې په موده کې د ولسوالیو پارا وټرانو له لوري تطبیق شو، چې د هر څاروي لپاره یې ۲.۵ افغانۍ لګښت درلود، ترڅو دا مرسته د مالدارانو لپاره پر وخت او مؤثره وي.
د دې واکسین موخه د مالدارانو ملاتړ، د مالدارۍ سکتور وده او پراختیا، د څارویو محصولاتو زیاتوالی، د مالدارۍ سکتور روغتیا ته ځانګړې پاملرنه او د چنجیو ناروغیو مخنیوی وو.
یاده دې وي، چې دوه اوونۍ وړاندې هم د کندهار د کرنې ریاست په هڅو، د ملګرو ملتونو د کرنې او خوړو نړیوال سازمان اف اې او په مالي ملاتړ، په کندهار کې ۲۵ زره غواګانې د طبق ناروغۍ د مخنیوي په موخه واکسین شوې وې.
