خوست ولايت کې د ځمکو د تثبيت چارې بشپړې شوې
۱۴ سلواغه ۱۴۰۳ه.ش
۴ شَعبان المُعَظّم ۱۴۴۶ه.ق
د عالیقدر امیرالمؤمنین (حفظه الله تعالی) د حکم په اساس صنعت او سوداګرۍ وزارت لپاره د هېواد په کچه په هر ولايت کې د زر جريبه ځمکې د تثبيت او انتقال په پار د صنعتي پارکونو د جوړولو په موخه خوست ولایت کې هم د ځمکو تثبيت چارې بشپړې شوې.
په دغه پروګرام کې، چی د کرنې وزارت د اراضۍ لوی ریاست لخوا په لاره اچول شوې وه په داسې حال کې، چې اراضۍ لوی ریاست د تصفيې او تثبيت حق مالکیت رياست د تصفيې ګروپونو د تنظیم عمومي مدير نذیر احمد هلال او د دغه ولايت د کرنې، کور او ښارجوړونې، اطلاعاتو او کلتور، ښاروالۍ، مصتوفیت، کانونو او پټروليم او صنعت او سوداګرۍ ریاستونو مسؤلينو په شتون کې د يادې ځمکې د تثبيت اسنادونه په رسمي بڼه لاسلیک او دغه سندونه به د نورو اجراادآتو په موخه مرکز ته واستول شي.
په پای کې د خوست ولایت مسؤلينو په یاد ولايت کې ددغه مسؤلیت د پایلې څخه خوښي څرګنده کړه او دا کار يې د هېواد د پرمختګ او هېواد والو ته د کار د زمينې برابرولو په برخه کې ښه اقدام وباله.
