میدان وردګو ولایت کې بزګرانو ته د غنمو د زېرمه کولو او ساتنې خدمتونه وړاندې کېږي
۱۱ سلواغه ۱۴۰۳ه.ش
۱ شَعبان المُعَظّم ۱۴۴۶ه.ق
د میدان وردګو ولایت په مرکز میدان ښار کې د کرنیزو خدمتونو عمومي مدیریت اړوند د غلهجاتو، حبوباتو، صنعتي او تیلي نباتاتو مدیریت تر چتر لاندې، د سټارز مؤسسې له خوا د ملګرو ملتونو د خوړو او کرنې ادارې په مالي ملاتړ هغو بزګرانو ته د تخنیکي روزنې او وسایلو وېش لړۍ روانه ده، چې مخکې ورته د غنمو اصلاح شوي تخمونه وېشل شوي وو.
په دې پروسه کې بزګرانو ته د اصلاح شویو غنمو د زېرمه کولو او ساتنې په موخه تخنیکي ټرینینګ او پلاستیکي کڅوړې او بوجۍ ورکول کېږي. تر دې دمه یاده چاره په درو حوزو کې بشپړه شوې او لا هم روانه ده.
د یادونې وړ ده چې د دې برنامې موخه د اصلاح شویو غنمو د حاصل ښه مدیریت، ضایعاتو مخنیوی او د بزګرانو د کرنیزو فعالیتونو پیاوړتیا ده.
