د ځنګلونو د ساتنې کمېټې چارواکو د پکتیا له والي سره وکتل
۴ سلواغه ۱۴۰۳ھ.ش
۲۳ رَجَب المُرَجَّب ۱۴۴۶ه.ق
د پکتیا دکرنې، اوبولګولو او مالدارۍ ریاست چاروکي وایي، چې د ځنګلونو ساتنې او شنو ونو دپرېکولو د مخنیوي کمېتې غړو د پکتیا والي الحاج ملا مهرالله حماد سره په کتنه کې د ځنګلونو د ساتنې او خوندیتوب په برخه کې خپل راپور وړاندې کړل.
پيل کې د يادې کميټې غړو د خپلو فعاليتونو په تړاو معلومات شريک کړل او د پکتیا والي ته يې ډاډ ورکړ، چې تر ډېره پکتيا ولايت کې د ځنګلونو د وهلو مخنيوی شوی او خلکو ته په دې برخه کې عامه پوهاوی ورکول شوی، چې ځنګلونه عامه شتمني ده او ساتل يې د چاپېريال او سیمې لپاره حياتي ارزښت لري.
د کميټې غړو د ځنګلونو وهلو د مخنيوي او سون توکو د بيو د کنترول په اړه خپل نظرونه او وړانديزونه له والي سره شريک کړل.
د پکتیا والي د يادې کميټې هلې ځلې وستايلې او ټينګار يې وکړ، چې ځنګلونه ملي شتمني ده او ساتل يې د ټولو شريک مکلفيت او زيمواري ده.
د پکتیا والي ټينګار وکړ، هغه وچ لرګي چې خلکو په کورونو کې ساتلي دي، د ټاکل شوي نرخ مطابق دې تر محدود وخت پورې وپلوري او اړوند مسؤلین دې نور هم د ځنګلونو د قطع کېدو مخنيوی، د سون توکو نرخونو کنترول او احتکار مخنيوی ته متوجه شي او هغه څوک چې په ياده برخه کې تخلف کوي عدلي او قضايي ارګانونو ته دي معرفي شي.
