د کرنې وزارت د ځنګلونو رییس د کندهار دکرنې له رییس سره وکتل
۳۰ مرغومې ۱۴۰۳ه.ش
۱۹ رَجَب المُرَجَّب ۱۴۴۶ه.ق
دکرنې، اوبولګولو او مالدارۍ وزارت د ځنګلونو رییس ملا سراج الحق میرویس ذاکري کندهار ولایت ته خپل سفر په ترڅ کې د کندهار د کرنې، اوبو لګولو او مالدارۍ ریاست په مقام کې د کندهار دکرنې رییس مولوي فضل الباري فضلي سره په داسې حال کې وکتل، چې ددې ریاست یوشمېر نور چارواکو هم شتون درلود.
ددې کتنې په ترڅ کې د روان ۱۴۰۳ کال د ځنګلونو، علفچرونو او نورو برخو پاتې پراختیایي بودیجې د اغېزمن مصرف په اړه خبرې اترې وشوې.
د کرنې وزارت د ځنګلونو رییس ملا سراج الحق میرویس ذاکري وویل، چې د ځنګلاتو، څړځایونو او ورته برخو لپاره ځانګړې شوې پراختیایي بودیجه باید په شفافه او اغېزمنه توګه د روان کال د پای ته رسېدو مخکې مصرف شي. هغه د منګالي فارم د قوریو جوړولو پر اهمیت او په روان کال کې د پاتې بودیجې پر مؤثره کارونې ټینګار وکړ. هغه زیاته کړه، چې راتلونکي کال ته باید د پرمختللو او اغېزمنو پلانونو لپاره په منظمه توګه تیاری ونیول شي، ترڅو د ځنګلاتو او څړځآیونو د پراختیا چارې ګړندۍ شي.
وروسته بیا د کندهار د کرنې، اوبو لګولو او مالدارۍ رییس الحاج مولوي فضل الباري فضلي د روان ۱۴۰۳ کال د ځنګلاتو ریاست اړوند پراختیایي بودیجې په شفاف او اغیزمن ډول سره د مصرف ډاډ ورکړ. هغه وویل، چې پاتې بودیجه به د راتلونکو دوو میاشتو په اوږدو کې په اغېزمنه او شفافه توګه مصرف شي. د دې موخې د لا شفافیت او ښه مدیریت لپاره یې په غونډه کې د یوې ځانګړې اتحادیې جوړولو پرېکړه وکړه. نوموړي زیاته کړه، چې د دې اتحادیې له لارې به ټولې چارې په منظمه توګه پر مخ یوړل شي او د بودیجې مصرف به په اغېزناک ډول تر سره شي.
نوموړي زیاته کړه، چې د راتلونکي ۱۴۰۴ هـ ش کال لپاره د ځنګلاتو ریاست اړوند پلان جوړ شوی، چې راتلونکي کال به تطبیق شي.
د غونډې په وروستۍ برخه کې د کندهار دکرنې رییس او د کرنې وزارت د ځنګلونو لوی رییس د پاتې بودیجې د اغېزمن مصرف لپاره اړینې پرېکړې وکړې. دواړو مشرانو د کرنې ریاست اړونده مسؤلینو ته سپارښتنه وکړه، چې د بودیجې چارو د ښه ترسره کېدو لپاره له نوښتونو څخه کار واخلي او د چارو د پرمختګ په هره مرحله کې د روڼتیا او مؤثریت معیارونه په پام کې ونیسي.
