کندهار کې د منګالي فارم جوړېدو چارې ۹۰ سلنه بشپړې شوي
۲۷ مرغومې ۱۴۰۳ھ.ش
۱۶ رَجَب المُرَجَّب ۱۴۴۶ه.ق
د کندهار د کرنې، اوبو لګولو او مالدارۍ ریاست له لوري د کندهار لوړ شاولیکوټ ولسوالی سربند پل ته څېرمه د منګالي فارم د جوړېدو چارې پیل شوي، چې تر دې دمه یې جوړېدو چارې ۹۰ سلنه بشپړې شوي دي. د دې فارم د جوړېدو د پرمختګ او کیفیت ډاډ لپاره د کندهار د کرنې ریاست د طبیعي سرچینو آمریت انجنیرانو په پرلهپسې توګه ورڅخه څارنه کوي.
د کندهار دکرنې ریاست د طبیعي سرچینو آمریت انجنیر نورمحمد همکار د دې فارم د چارو څخه څارنه کړې او اړوند مسؤلینو ته یې د پرمختګ او کیفیت د لا ښه والي لپاره اړینې سپارښتنې کړې دي. نوموړي څرګنده کړه، چې د فارم پاتې چارې به په راتلونکو څو ورځو کې بشپړې شي.
د منګالي فارم جوړېدو چارې د کرنې، اوبو لګولو او مالدارۍ وزارت په پراختیایي بودیجه د څه باندې ۳.۷ میلیونه افغانیو په ارزښت ۳ میاشتي وړاندې پیل شوي دي. دا فارم د مېوه لرونکو او غیر مېوه لرونکو نیالګیو د وېش او روزنې لپاره جوړېږي. د دې فارم په جوړېدو سره به د کندهار او نورو ولایتونو لپاره نیالګي وروزل شي.
د کندهار کرنې ریاست تل هڅه کوي، چې د خپلو پراختیایي او غیر پراختیایي پروژو څخه د چارو د ښه ترسراوي او چټکتیا لپاره د خپلو مسلکي کارکوونکو په مټ څارنه وکړي، ترڅو چارې په ښه توګه پر مخ یوړل شي.
