کندهار خاکریز ولسوالۍ کې د ۱۶ میلیونه افغانیو په ارزښت د چکډېم جوړېدو چارې پیل شوې
د کندهار ولایت خاکریز ولسوالۍ بغکه سیمه کې د کرنې، اوبو لګولو او مالدارۍ ریاست په هڅو او د اقتصاد ریاست په همغږۍ، د ملګرو ملتونو د پراختیایي پروګرام (یو. ان. ډي. پي) په مالي ملاتړ او د یو خصوصي ودانیز شرکت په تخنیکي همکارۍ، د ۱۵ میلیونه ۹۸۹ زره افغانیو په ارزښت د چکډېم جوړېدو چارې پیل شوې.
یاد چکډېم ۸۰ متره اوږدوالی او ۱۲ متره لوړوالی لري، چې د جوړېدو چارې به یې د درېیو اونیو په اوږدو کې په اساسي او پاخه ډول بشپړې شي. د دې پروژې پر مهال ۲۰ کسانو ته په فني او ۶۰ کسانو ته په غیرفني برخو کې د کار زمینه برابره شوې ده.
د چکډېم د جوړېدو موخه د باراني اوبو راټولول، د ځمکې لاندې د اوبو سطحې لوړول، او د بزګرانو او مالدارانو ملاتړ دی، ترڅو د اوبو اړوند ستونزې حل او د سیمې اقتصادي وضعیت ښه شي.
یادونه باید وشي، چې له دې وړاندې هم د خاکریز ولسوالۍ اټلي سیمه کې د ۳.۶ میلیونه افغانیو په ارزښت د یو بل چکډېم جوړېدو چارې پیل شوې وې.
