کندهار کې د طبق ناروغۍ د مخنیوي واکسین کمپاین پیل شو  

۴ مرغومې ۱۴۰۳ه‍.ش
۲۲ جُمَادَى الثاني۱۴۴۶ه‍.ق
په کندهار کې د غواګانو د طبق (ایف.ایم.ډي) ناروغۍ د مخنیوي لپاره واکسین کمپاین پیل شو. دغه کمپاین د کرنې، اوبو لګولو او مالدارۍ ریاست د څارویو روغتیا او صحت آمریت په هڅو، د ملګرو ملتونو د خوراک او کرنې نړیوال سازمان (ایف.اې.او) په مالي ملاتړ او تخنیکي همکارۍ ترسره کېږي.
د کمپاین په لړ کې به د کندهار ښار په ۱۵ ناحیو کې د غواګانو ۷۰۰ فارمونه واکسین شي، چې ټولټال ۲۵ زره ډوزه واکسین به تطبیق شي. د مالدارۍ آمریت سرپرست آمر الحاج مولوي عبدالغني عفان وویل، که واکسین زیات شي، نو په ډنډ او دامان ولسوالیو کې به هم تطبیق شي.
د یاد واکسین کمپاین موخه په کندهار کې د مالدارانو ملاتړ، د طبق ناروغۍ په وړاندې وقایوي تدابیر نیول، د غواګانو د مړینې کچه راکمول او سالمه مالدارۍ پراخول دي.
مالداران د کرنې، اوبو لګولو او مالدارۍ ریاست او د ایف.اې.او له همکارۍ خوښ دي او وایي چې د واکسین کمپاین په ترسره کېدو سره د هغوی اقتصادي وضعیت ښه کېدلی شي.
یوازې تېره اونۍ د کندهار کرنې ریاست په هڅو او د اروپایي ټولنې په مالي ملاتړ د کوچنیو څارویو لپاره د چنجیو ضد درملو کمپاین ترسره شو. دغه کمپاین د کندهار په ۷ ولسوالیو کې شاوخوا ۲۹ زره کوچني څاروي ته رسیدلی و، چې مالدارانو یې پراخ ملاتړ کړی و.