کندهار کې د تازه شيدو تولید زیاتولو او ستونزو حل لپاره د همغږۍ غونډه ترسره شوه
د کندهار د کرنې، اوبو لګولو او مالدارۍ ریاست د مالدارۍ سرپرست آمر الحاج مولوي عبدالغني عفان په مشرۍ د غواګانو مالدارانو د همغږۍ یوه غونډه ترسره شوه. په دې غونډه کې د غواګانو فارمدارانو، د غواګانو ټولنو استازو او د مالدارۍ آمریت ګڼو مسؤلینو ګډون کړی و.
د غونډې موخه د تازه شیدو تولید زیاتول، د شیدو محصولاتو لپاره د بازار موندنې پیاوړتیا، د پوډري شیدو د مخنیوي لپاره د تدابیرو لټون او د غواګانو د ستونزو د حل لپاره د همکارۍ موندل وو.
په پیل کې، د مالدارۍ سرپرست آمر د تازه شیدو د تولید زیاتولو، د شیدو د اغېزمنې بازار موندنې، د فارمدارانو لپاره د ټولنو جوړولو، د شیدو د کیفیت لوړولو او د پوډري شیدو د مخنیوي په اړه خبرې وکړې. هغه ډاډ ورکړ چې د مالدارۍ آمریت به د مالدارانو ملاتړ ته دوام ورکړي.
مالدارانو د کرنې او مالدارۍ ریاست د همکارۍ مننه وکړه او خپلې ستونزې یې له چارواکو سره شریکې کړې. د مالدارۍ آمریت مسؤلینو ژمنه وکړه، چې د ستونزو د حل لپاره به هر اړخیز اقدامات ترسره کړي.
