دهلمند ولایت موسی قلعه کې دپنبې د پروسس ماشينونه فعاله او ګټې اخستتې ته وسپارل شول

۲۸ لېندۍ ۱۴۰۳ه‍.ش
۱۶ جُمَادَى الثاني۱۴۴۶ه‍.ق
دهلمند ولایت د کرنې، اوبولګولو او مالدارۍ ریاست په هلو ځلو، دموسی قلعه ولسوالی کې د خوړو نړۍوال پروګرام په مالي او دکندهار د کډوالو مؤسسې په تخنيکي همکارۍ، ځان بسیاینې ته د رسېدو اوغذايي سيسټم پروژې ترچتر لاندې د پنبې د پروسس دوه پایې ماشينونه نصب او ګټې اخستنې ته وسپارل شول.
دغه ماشینونه د یادې ولسوالی د کرنیزو خدمتونو مدیریت او نورو مسؤلینو په حضور کې ددغې ولسوالی اړوند ښهرګي او بغني مانده په سیمو کې فعاله شوي دي، چې بزګران به پکې پنبه او پنبه دانه سره جلا کوي او بیا به یې بازار ته وړاندې کوي.
په ورته وخت کې د یادو سیمو اوسېدونکو ددغو ماشینونو په فعالیدو سره خوښي وښوده او وې ویل، چې پخوا به یې دغه چاره په عنعنوي او محلي شکل سرته رسول، چې دامهال به ورته دیادو ماشینونو څخه په ګټې اخستنې ګڼې اسانتیاوې رامنځته شي.