مرکزي بغلان کې د څلور میلیونه افغانیو په ارزښت د کانال د جوړولو چارې پیل شوې
د بغلان په مرکزي بغلان ولسوالۍ کې د کرنې ریاست له لوري د څلور میلیونه افغانیو په ارزښت د یوه کانال د جوړولو چارې پیل شوې.
د بغلان ولایت د کرنې، اوبولګولو او مالدارۍ رئیس الحاج مولوي رحیم الله "احدي" او د طبيعي سرچینو آمر محمد ابراهیم "عثماني" وایي، چې دغه کانال ۷۸۸ متره اوږدوالی، ۱۴۰ سانتي متره پلنوالی او ۱۷۰ سانتي متره ژوروالی لري. د دې کانال په بشپړېدو سره به ۵زره جریبه کرنیزه ځمکه خړوبه شي.
یاد چارواکي زیاتوي، چې د دې پروژې په ترڅ کې به ۵۰ کسانو ته د کار زمینه برابره شي او تمه ده، چې کارونه به یې په دوو میاشتو کې بشپړ شي.
د مرکزي بغلان د ولسوال مرستیال مولوي عمیر او د انارخیلو سیمې بزګران وایي، چې د کانال په جوړولو سره به د دوی په کرنیزو حاصلاتو کې د پام وړ زیاتوالی راشي. همدارنګه، دغه کانال به د اوبو په سالم مدیریت کې مهم رول ولوبوي.
د یادونې وړ ده، چې دغه پروژه د کرنې وزارت د پراختیایي بودیجې په مالي ملاتړ عملي کېږي.
