هلمند کې  زرګونو بزګرانو ته  د غنمو کرکیلې په اړه  زده کړې ورکول کېږي

د هلمند ولایت د کرني، اوبولګولو او مالدارۍ ریاست لخوا، په دې ولایت کې زرګونو بزګرانو ته د غنمو ښې کرکیلې او روزنې په اړه زده کړې ورکول کېږي.
د هلمند دکرنې ریاست چارواکي وایي، چې ددې پروګرامونو په ترڅ کې د دې ولایت د مرکز لښکرګاه ترڅنګ د ناوې، واشېر، ګرمسېر، موسی قلعه، کجکي، خانشین، باغران، دیشو، مارجه، ناومیش، نادعلي، نهرسراج، نوزاد، سنګین، ګرشک، بغني، بهرامچه  او باباجي ولسوالیو هغه بزګران شامل دي چې مخکې ورته د غنمو اصلاح شوي تخمونه او کیمیاوي سرې ویشل شوي دي.
دغو بزګرو ته د غنمو د کرنې لپاره د ځمکې جوړول، د تخم کرل، اوبه لګول، د هرزه وښو او ناروغیو مخه نیول، د حاصلاتو راټولول او نور اړین معلومات د مسلکي کسانو لخوا ورکول کېږي.
دغه زده کړې د نړۍوال بانک او د ملګرو ملتونو د خوړو اوکرنې ادارې په مالي او د پوهي کچي لوړولو یا جک مؤسسې په تخنیکي همکارۍ ترسره کېږي.
د دغو زده کړو موخه په هلمند کي د اصلاح شویو تخمونو رواجول، د بزګرو او مځکوالو ملاتړ او له کمو مځکو څخه د لوړو حاصلاتو ترلاسه کول دي.