ننګرهار کې څه باندې ۲۱ زره بزګرانو ته د غنمو اصلاح شوي تخم او کیمیاوي سرې ووېشل شوې

۱۳ لېندۍ ۱۴۰۳ه‍.ش
۲ جُمَادَى الثاني۱۴۴۶ه‍.ق
د ننګرهار د کرنې، اوبو لګولو او مالدارۍ ریاست سره په همغږۍ د ملګرو ملتونو د خوړو او کرنې ادارې په مالي لګښت او د اکشن اېډ مؤسسې په تخنیکي همکارۍ ۲۱ زره او ۱۰۰ بزګرانو ته د غنمو اصلاح شوي تخمونه او کیمیاوي سرې ووېشل شوي.
د ننګرهار د کرنې، اوبو لګولو او مالدارۍ رییس مولوي محمد ولي محسن وویل، چې د اکشن اېډ مؤسسې د ننګرهار په ۱۳ ولسوالېو بهسود، پچیراګام، خوږیاڼي،شېرزاد، حصارک، دره نور، کوزکنړ، کامه، ګوشته، لعلپوره، مومندره، اچین او هسکه مېنه کې ۲۱زره او ۱۰۰ بزګرانو ته د غنمو اصلاح شوي تخم او کیمیاوي سرې ووېشلي.
ښاغلي  محسن وویل، چې هر بزګر ته ۵۰ کیلو اصلاح شوي تخم، ۵۰ کیلو یوریا او ۵۰ کیلو توره سره د ډېر حاصل ترلاسه کولو او خوړو خوندیتوب په موخه ورکړل شوه.
هغه زیاته کړه، چې په نږدې راتلونکې کې به د ۸ ولسوالیو ۴ زره او ۷۰۰ نورو بزګرانو ته هم د غنمو اصلاح شوي تخم او کیمیاوي سرې ورکړل شي.
دغه راز د اکشن ايډ مؤسسې مسؤل انجنیر عبدالسلام هلالي، چې وویل یادو بزګرانو ته د غنمو کرلو، کرنیزو عملیو، سرې استعمال، اوبولګولو، هرزه وښو کنټرول، ناروغیو مخنیوي او نورو برخو کې روزنه هم ورکړل شوې ده.