روزګان کې د اوبولګولو دیوې پروژې چارې پیل شوې
۶ لېندۍ ۱۴۰۳ه.ش
۲۴ جُمَادَى الأول ۱۴۴۶ه.ق
د روزګان دکرنې، اوبولګولو او مالدارۍ ریاست چارواکي وایي، چې ددې ولایت د مرکز ترینکوټ اړوند د کرنا کانال رغنیزې چارې پیل شوې.
د چارواکو په خبره یاد کانال به په پاخه او اساسي ډول ورغول شي، چې په رغېدو سره به یې ۶۰ هکټاره ځمکه خړوبه شي.
دغه کانال چې د ترینکوټ د کرنیزو ځمکو او بڼونو خړوبولو په موخه جوړېږي، د سیمې د زرګونو بزګرانو لپاره د اوبو د دوامداره او خوندي لاسرسي په برخه کې یو مهم پرمختګ رامنځته کېږي او د اوبو رسولو کې به د یادې سیمي وګړو ته اسانتیا رامنځته شي.
بل لور ته د سیمې خلکو بیا د کرنې او اقتصادي پیاوړتیا په برخه کې دا ډول پروژې ډېرې ګټورې وبللې هغوی د کرنې وزارت او اړوند ریاستونو څخه مننه وکړه، چې ددوی لپاره داسې بنیادي پروژې پلي کوي.
