د کندهار ولایت په دامان ولسوالۍ کې د غنمو د ویش لړۍ پیل شوه
د کندهار د کرنې، اوبو لګولو او مالدارۍ ریاست په همغږۍ، د خوراک نړیوال سازمان او د دامان ولسوالۍ د کرنې او مالدارۍ مسؤلینو په ګډه، په یاده ولسوالۍ کې د ۳۰۰۰ بزګرانو لپاره د غنمو د ویش لړۍ پیل شوه.
د دې لړۍ د پرانیستې په موخه ځانګړې غونډه ترسره شوه چې پکې د کرنې، اوبو لګولو او مالدارۍ ریاست د کرنیزو چارو آمر مولوي شمس الرحمن موسی، د دامان ولسوال، د کرنې مسؤلین، د خوراک نړیوال سازمان او خیریه مؤسسو استازو او ګڼ شمېر بزګرانو ګډون وکړ.
غونډه د قرآن عظیمالشان د مبارکو آیتونو په تلاوت پیل شوه. ورپسې مولوي شمس الرحمن موسی وینا وکړه، چې په کې یې د مرستندویه مؤسسو د هڅو ستاینه وکړه. هغه وویل چې دغه مرستې د مستحقو کسانو لپاره دي او د ویش څخه وړاندې د ګډ هیئت لهخوا سروی ترسره شوې ده.
نوموړي له بزګرانو وغوښتل چې ورکړل شوي غنم د خوراک نړیوال سازمان د روزنې سره سم وکري، ترڅو د دې تخمونو ګټه درې کلونو پورې وشي. هغه په کلکه د غنمو تخمونو او کیمیاوي سرو د پلورلو مخه نیولو ټینګار وکړ او د کیمیاوي سرو د مناسبې کارونې سپارښتنه وکړه.
په غونډه کې د دامان ولسوال او د همکارو مؤسسو استازو هم خبرې وکړې او ژمنه یې وکړه چې په راتلونکي کې به د بزګرانو د ملاتړ لپاره نورې مرستې وکړي.
غونډه د بزګرانو په ویناوو پای ته ورسېده. هغوی د کرنې ریاست او همکارو مؤسسو د مرستو مننه وکړه او غوښتنه یې وکړه چې د دامان په څېر نورو ولسوالیو ته هم ورته پاملرنه وشي.
د معلوماتو له مخې، په دامان ولسوالۍ کې به ۳۰۰۰ بزګرانو ته د لسګونو ورځو په ترڅ کې ۵۰ کیلوګرامه اصلاح شوي د غنمو تخم، ۵۰ کیلوګرامه سپینه سره او ۵۰ کیلوګرامه توره سره وویشل شي.
