د کندهار پنجوایي کې د ځنګلونو پرې کولو مخنیوي او پوهاوي لپاره څارنه ترسره شوه
۲۳ لړم ۱۴۰۳ه.ش
۱۱ جُمَادَى الأول ۱۴۴۶ه.ق
د کندهار د کرنې، اوبو لګولو او مالدارۍ ریاست د پنجوایي ولسوالی ځنګلونو او څړځایونو د تنظیم مدیر په مشرۍ د یادې ولسوالی ډورۍ غاړې ځنګلونو د پرې کولو مخنیوي، ساتنې او پوهاوي په موخه څارنه وکړه. په دې ترڅ کې، د سیمې اوسېدونکو او مالدارانو ته د ځنګلونو پرې کولو مخنیوي، ساتنې او ارزښت په اړه معلومات وړاندې شول.
مسؤولینو د سیمې اوسېدونکو ته په ټینګار سره وویل: چې د ځنګلونو پرې کولو څخه ډډه وکړي، ساتنې ته دې یې پام کوي او د هر ډول تخریب او زیان څخه دې ساتي. د یادې څارنې موخه د طبیعي شتمنیو په ارزښت باندې د سیمې اوسېدونکو پوهول و چې د ځنکلونو د پرې کولو څخه ډډه وکړي.
مسؤولینو زیاته کړه چې هېڅ ډول زیانمن فعالیت ته به اجازه ور نه کړي او په دې برخه کې به جدي اقدامات ترسره شي.
یاده دې وي چې د پنجوایي ولسوالی ترڅنګ د ارغنداب ولسوالۍ کې هم د طبیعي شتمنیو څارنه په منظم ډول ترسره کېږي او ځایي اوسېدونکو ته عامه پوهاوی ورکول کېږي ترڅو د کندهار طبیعي سرچینې د تخریب څخه وساتل شي.
