د کندهار ارغنداب کې سلګونو اړمنو کورنیو ته مرستې ووېشل شوې
د کندهار ولایت د ارغنداب ولسوالی په سلګونو اړمنو کورنیو بلاربې وزې او حیواني خوراکه ووېشل شوه. دا مرستې د کندهار کرنې، اوبو لګولو او مالدارۍ ریاست په هڅه، د "آی. آر. یو. کې" سازمان په مالي ملاتړ او د اسلامي هوساینې مؤسسې په تخنیکي همکارۍ، د ارغنداب ولسوالی د کرنې او مالدارۍ مسؤلینو تر څارنې لاندې ترسره شوې.
د دې مرستې لپاره مخکي سروې ترسره شوې وه، چې له مخې یې ۲۱۵ اړمنو، بېوزلو او غریبو کورنیو ته د شاوخوا ۲۲ زره افغانیو په ارزښت یوه یوه د ګلابي نسل وزه او ۵۰ کیلوګرامه حیواني خوراکه ورکړل شوې. د دې مرستې موخه د اړمنو کورنیو اقتصادي ملاتړ او د هغوی د ژوند شرایط ښه کول دي.
د یادونې وړ ده، چې د اسلامي هوساینې مؤسسې تر دې وړاندې هم شاوخوا یوه میاشت مخکې د کندهار ارغستان ولسوالۍ کې ۵۰۰ اړمنو کورنیو ته ورته مرستې وېشلې وې.
