کندهار څخه بهرنیو هېوادونو ته د ریحانو صادراتو بهیر رسماً پیل شو
۲۱ لړم ۱۴۰۳ه.ش
۹ جُمَادَى الأول ۱۴۴۶ه.ق
د کندهار د کرنې، اوبو لګولو او مالدارۍ ریاست د وطني ریحانو د صادراتو بهیر د پیل لپاره نن یوه ځانګړې غونډه ترسره کړه. په دې غونډه کې د کرنې ریاست استازو، د کندهار ولایت مقام استازو، د سوداګرۍ او پانګونې خونې استازو او ګڼ شمېر سوداګرو ګډون کړی و.
د غونډې په جریان کې بهرنیو هېوادونو ته د وطني ریحانو د صادراتو لپاره یو منظم میکانیزم ترتیب شو. سوداګرو ته د صادراتو د ښه او منظم ترسره کولو لپاره یوه رسمي شرط پاڼه هم جوړه شوه، ترڅو د کرنیزو محصولاتو شهرت او کیفیت په نړیواله کچه لوړ وساتل شي.
همداراز، د نبات ژغورنې مدیریت او د کرنتین مسؤلینو د چارو په اړه هم هر اړخیزه څارنه ترسره شوه او اړوند مسؤلینو ته لازمې سپارښتنې وشوې، ترڅو په راتلونکي کې د کرنیزو صادراتو کیفیت او موثریت نور هم لوړ شي.
