د هلمند د بولان څېړنیز فارم د اصلاح شويو جوارو حاصلات راټول شول

۱۹ لړم ۱۴۰۳ه‍.ش
۷ جُمَادَى الأول ۱۴۴۶ه‍.ق
د هلمند ولایت د کرنې، اوبولګولو او مالدارۍ ریاست اړوند بولان څېړنیز فارم کې د جوارو ۸ اصلاح شوي ډولونه کرل شوي، چې د حاصلاتو راټولول یې پیل شول.
د هلمند ولایت بولان څېړنیز فارم کې د کرنې مسلکي کارکوونکو په بیلابیلو نباتاتو، په ځانګړي ډول جوارو، څېړنې ترسره کړې دي. په دې فارم کې د جوارو ۸ ډولونو حاصلات راټول شوي، چې په دې کې ۳ اصلاح شوي هستوي او مورني تخمونه هم شامل دي. د حاصلاتو معلومات به ژر تر ژره اړوندو امریتونو سره شریک شي.
بولان څېړنیز فارم د سویل لویدیځ زون یوازنی سترڅېړنیز فارم دی، چې د کرنې په برخه کې د مېوو لکه کیلې، ناکو، املوکو او اینځرو په روزنه او څېړنه کې هم فعالیت کوي. یاد فارم د هلمند ترڅنګ نورو ولایتونو ته هم د اصلاح شويو تخمونو په وړاندې کولو کې مهم رول لري.