د پکتیا جاني خېلو کې د اوبولګولو د یوې پروژې چارې پیل شوې
۸ لړم ۱۴۰۳ه.ش
۲۶ رَبِیعُ الْثاني ۱۴۴۶ه.ق
د پکتیا دکرنې، اوبولګولو او مالدارۍ ریاست وایي، چې د ملګرو ملتونو د پراختیایي پروګرام په مالي او د پاملرنې مؤسسې په تخنیکي همکارۍ ددې ولایت د جاني خېلو ولسوالی اړوند د اورګوړپه کلي کې د اوبولګولو د یوې پروژې چارې پیل شوې.
ددې پروژې په پیل غونډه کې د جاني خېلو ولسوال محمد نبي «جاویدالرحمن»، د پکتیا دکرنې ریاست چارواکي، د امر بالمعروف آمر، د پاملرنې مؤسسې استازو او دیادې ولسوالی قومي مشرانو او بزګرانو ګډون کړی وو.
د جاني خېلو ولسوال محمد نبي «جاویدالرحمن» وویل، چې ددې پروژې په ترڅ کې ۲۵۰ متره کانال او سربند او ۲۰۰ متر محافظتي دېوال جوړېږي، چې په بشپړېدو سره یې ډېر شمېر کرنیزې ځمکې ته پر وخت د اوبو رسولو ترڅنګ ډېری کرنیزې ځمکې او کورونه له سېلابونو خوندي کېږي.
دغه پروژه، چې د نږدې دوه نیم میلیونه افغانیو په ارزښت د یوې میاشتې په موده کې پلي کېږي، په ترڅ کې یې یوشمېر سیمه ییزو خلکو ته د کار زمینه هم برابره شوې ده.
