روزګان کې پر زرګونو بزګرانو د غنمو اصلاح شوي تخمونو او کیمیاوي سرې وېش لړۍ پيل شوه 

۶ لړم ۱۴۰۳ه‍.ش
۲۴ رَبِیعُ الْثاني ۱۴۴۶ه‍.ق
د روزګان ولایت د کرنې، اوبولګولو او مالدارۍ ریاست د ملګرو ملتونو دخوړو او کرنې ادارې په مالي او د«او،اچ،ډبلیو» او «اې،ان،سي،سي» مؤسسې په تخنیکي همکارۍ ددې ولایت د مرکز ترڅنګ په ټولو ولسوالیو کې پر ۱۷  زره بزګرانو د غنمو د اصلاح شویو تخمونو او کیمیاوي سرو وېش لړۍ پیل کړی دی، چې موخه یې د غنمو دحاصلاتو زیاتوالی، د کرنیزو محصولاتو کیفیت لوړول او د بزګرانو اقتصادي وضعیت ښه کول دي.
د روزګان دکرنې رییس مولوی عطاءالله راشد وویل، چې د یادو مستحقو کروندګرو د سروې او انتخاب چارې په اړونده ولسوالیو کې د ګډې کمیټې لخوا چې په ترکیب کې یې د ولسوالی، کرنې، امنیې قوماندانۍ او استخباراتو  استازي شامل دي ترسره شوې ده.
په دغه پروسه کې هغه بزګران چې د ٢ څخه تر ٥ جریبه ځمکه ولري، اقتصادي وضعیت یې کمزوری وي، د تخم او کیمیاوې سرې د پیرلو توانایي نلري مستحق پېژندل کېږي، تر سروې وروسته هر کروندګر ته ۵۰ کیلوګرامه د غنمو اصلاح شوي تخم، ۵۰ کیلو سپینه او ۵۰ کیلو توره سره ورکول کېږي، ترڅو یاد بزګر پر وخت دغه تخمونه ترلاسه کړي او راروان دغنمو فصل ته ورته بشپړ چمتوالی ولري.
ښاغلی راشد وویل، چې پر بزګرانو د غنمو د وېش لړۍ له چورې ولسوالی څخه پیل شوه، چې په دې ولسوالی کې پر درې زره بزګرانو د غنمو اصلاح شوي تخم او کیمیاوي سرې وېشل شوي دي.
په همدې حال کې د یاددو مرستو په پیل غونډه کې د روزګان د اقتصاد رییس مولوي مولا داد حسن وویل، چې د کرنیزو محصولاتو ښه والی او د تولید کچه لوړېدل نه یوازې د بزګرانو لپاره مستقیمه ګټه لري بلکې د ټولنې په اقتصادي وده کې هم رغنده ونډه لري. د اصلاح شویو تخمونو کارول د کرنې په برخه کې یوه مهمه پرمختیایي کړنلاره ګڼل کېږي، چې د اوبو او کیمیاوي سرې سم مدیریت کول یې اړین دي.
د بشري خیریه مؤسسې ولایتي مسوول ووی،ل چې د دې پروژې په عملي کېدو سره به بزګران وکولای شي، چې د خپلو فصلونو حاصل زیات کړي، په ځانګړې توګه په داسې شرایطو کې چې اقلیمي بدلونونه او وچکالي د کرنیزو فعالیتونو مخه نیسي.
د نوموړي په خبره د کرنیزو توکو د کیفیت لوړېدل به له دې سره مرسته وکړي، چې بزګران وکولای شي، چې خپل محصولات په لوړه بیه بازار ته وړاندې کړي.
بل لور کروندګر خوښ دي، چې د دا ډول مرستې ورسره کېږي، تر څو یې حاصلات ښه او کرنیز توکي یې پرمختګ وکړي.
د دغو مرستو موخه په دې ولایت کې د اصلاح شویو تخمونو دودول، د بزګرو او ځمکوالو ملاتړ او له کمو ځمکو څخه د لوړو حاصلاتو ترلاسه کول دي.