هلمند کې د ۴۲ میلیونه افغانیو په لګښت د شیدو د پروسس فابریکه جوړېږي
د هلمند ولایت کې د کرنې، اوبولګولو او مالدارۍ ریاست په هڅو، د لښکرګاه ښار په مرکز کې د خصوصي سکتور له خوا د شاوخوا ۴۲ میلیونه افغانیو په لګښت د شیدو د پروسس یوه فابریکه جوړېږي.
د کرنې، اوبولګولو او مالدارۍ رئیس الحاج مولوي نیازمحمد وهاج صاحب، د مالدارۍ او د څارویو روغتیا آمر حافظ هدایت الله هدایت او نورو مسؤلینو سره نن له غرمې مخکې د یادې فابریکې د رغنیزو چارو او راوړې ماشینرۍ له نږدې لیدنه وکړه.
یاده فابریکه د کرنې ریاست اړوند خالص ملکیت کې، د خصوصي شرکت له خوا او د ځانګړي قرارداد له مخې جوړېږي. په دې فابریکه کې به هره ورځ ۴۰ مټریک ټنه شیدې پروسس کېږي او لبنیاتي محصولات به یې د هلمند په شمول نورو ولایتونو ته هم لېږدول کېږي.
د ظاهرشاه د حکومت پر مهال فعاله شوې دغه فابریکه، چې د وروستیو انقلابونو په جریان کې ویجاړه شوې وه، وروسته له لسګونو کلونو بېرته رغول کېږي. د دې فابریکې له رغېدو سره به ګڼ شمېر کسانو ته د کار زمینه برابره شي او د ځایي مالدارانو لپاره به د شیدو بازار موندنه هم اسانه شي. د هلمند د کرنې ریاست هڅه کوي، چې په دې ولایت کې مؤثرې او بنیادي پروژې طرح او تطبیق کړي او تر دې وړاندې یې هم ورته عملي اقدامات ترسره کړي دي.
