د ننګرهار وادي کرنیز امارتي شرکت د حیواني سرې له پلور څخه ٥١٠زره افغانۍ عواید ترلاسه کړې
١٩ تله ۱۴۰۳ه.ش
٧ رَبِیعُ الْثاني ۱۴۴۶ه.ق
د ننګرهار وادي کرنیز امارتي شرکت د مالدارۍ فارم امر، انجنیر شکرالله نورزی، وايي چې د دغه فارم د حیواني سرې د پلور له لارې یې ٥١٠ زره افغانۍ عواید ترلاسه کړي دي او دغه عواید یې د ننګرهار کانال امارتي شرکت بانکي اکاونټ ته تحویل کړي دي.
د کرنې د برخې کارپوهان وايي چې عضوي سره، چې په طبیعي ډول تولیدیږي، د دې لپاره کارول کیږي چې نبات ته خوراکي مواد چمتو کړي او د ودې بهیر یې تقویه کړي. د دې سرې په استعمال سره، بزګران کولی شي خپلې ځمکې اصلاح کړي، ترڅو نباتات په اسانۍ سره له خاورې خوراکي مواد ترلاسه او خپل ضرورتونه پوره کړي.
همدارنګه، د عضوي سرې استعمال بزګرانو ته دا امکان ورکوي چې د کیمیاوي سرې مصرف کم کړي، چې په پایله کې به ورته اقتصادي او ارزانه تمام شي.
