ننګرهار کې دوریجو اړتیا معلومولو په موخه د شولو ۲۵۸ نمونې واخېستل شوې

١٧ تله ۱۴۰۳ه‍.ش
٥ رَبِیعُ الْثاني ۱۴۴۶ه‍.ق
دکرنې، اوبو لګولو او مالدارۍ وزارت او احصایي ملي ادارې په ګډې همکارۍ د ننګرهار په ۱۳ ولسوالیو کې د شولو  نمونو اخېستلو سروې پای ته ورسېده.
د ننګرهار د کرنې، اوبو لګولو او مالدارۍ رییس مولوي محمد ولي محسن وویل د ننګرهار ۱۳ ولسوالیو په ۹۱ کلیو کې ۲۵۸ شولو نمونې واخېستل شوې.
ښاغلي محسن وویل، چې د ننګرهار د کرنې ریاست مسلکي کارکوونکو له لورې په هر کلي کې د شولو درې ـ درې نمونې د حاصل معلومولو په موخه اخیستل شوي.
د کرنې وزارت داحصایي برخې کارپوه انجنیر امر امرالدین صدیقي وویل، چې د ننګرهار په سره رود، خوږیاڼو، حصارک، بهسود، کوزکونړ، کامه، دره نور، هسکه مېني، سپین غر، کوټ، بټي کوټ، پچیراګام  او مومندرې ولسوالیو کې د شولو حاصل معلومولو په موخه د نمونو اخیستل پای ته رسیدلې او د نمونو د وزن، اندازې او رطوبت معلومولو چارې دوام لري.
ښاغلي صدیقي زیاته کړه، چې د یاد سروې موخه د وریجو د داخلي تولیداتو اړتیا او اندازې معلومول دي، ترڅو معلومه شي، چې څومره تولید لرو، اړتیا څومره ده چې دهغې پر اساس د وریجو تولیدات او واردات ترسره شي.
دغه راز د یادو ولسوالیو ۲۶ تنو کارکونکو ته د سروې ترسره کولو په موخه روزنه هم ورکړل شوې وه.