اروزګان کې نږدې پنځه زره بزګرانو د غنمو د اصلاح شويو تخمونو او کيمياوي سرو د وېش لړۍ پيل شوه
۹ تله ۱۴۰۳ه.ش
۲۷ رَبِیعُ الْأَوَّل ۱۴۴۶ه.ق
د اروزګان ولايت د کرنې، اوبولګولو او مالدارۍ رياست د ملګرو ملتونو د خوړو او کرنې ادارې په مالي او د «اې،ان،سي،سي» مؤسسې په تخنیکي همکارۍ ددې ولایت په مرکز ترینکوټ او چهارچینو ولسوالی کې پر څلور زره او ۷۰۰ اړمنو بزګرانو د غنمو د اصلاح شويو تخمونو او کيمياوي سرو د وېش لړۍ پيل شوه.
په دې اړه جوړه شوې مراسمو کې د اروزګان ولایت والي مولوی عنایت الله شجاع، د کرنې رییس مولوی عطاءالله راشد، د اقتصاد رییس مولوی مولاداد حسن، د همکارې مؤسسې مسئولینو، بزګرانو او قومي مشرانو ګډون کړی وو.
د اروزګان والي ګډونوالو ته د ښه راغلاست ترڅنګ د همکارو موسسو څخه مننه وکړه او بزګرانو ته یي وویل، چې هڅه وکړئ یاد اصلاح شوی تخمونه په خپلو ځمکو کې وکرئ تر څو ښه حاصل ترلاسه کړئ.
د کرنې، اوبو لګولو او مالدارۍ رییس مولوی عطاءالله راشد په خپلو خبرو کې وويل، چې د ياد پروګرام له لارې هر بزګر ته ۵۰ کيلو اصلاح شوي غنم، ۵۰ کيلو توره سره او ۵۰ کيلو ګرامه سپينه سره په وړيا ډول ورکول کېږي.
ښاغلی راشد زياته کړه، چې د ياد پروګرام له تطبيق څخه يې موخه د اړمنو بزګرانو پر پښو اودرول دي، نوموړي له بزګرانو وغوښتل، چې پر خپلو ځمکو يې وکري، ترڅو اقتصادي وضعيت يې ښه شي.
د یادولو وړ ده، چې په نږدې ورځو کې به د نورو بزګرانو سروې هم وشي او د غنمو اصلاح شوی تخمونه او کیمیاوی سرې به ورته ورکړل شي.
