کندهار کې د کرنې وزارت مالي او اداري مرستیال له مووسسو سره د همغږۍ ناسته ترسره کړه

د کندهار په کرنې، اوبو لګولو او مالدارۍ ریاست کې د وزارت مالي او اداري مرستیال مولوي آغاجان آخند (حاجي سالم) په مشرۍ د همکارو مووسسو سره د همغږۍ او د کرنې او مالدارۍ موخو ترلاسه کولو په موخه ناسته وشوه. په دې ناسته کې د کندهار د کرنې رییس مولوي فضل الباري فضلي، د مووسسو مسوولینو او د کابل څخه راغلي پلاوي ګډون درلود.
غونډه د قران عظیم الشان په تلاوت پیل شوه. د کندهار د کرنې رییس مولوي فضل الباري فضلي د وزارت مرستیال له سفر او همکارو مووسسو له همکاریو مننه وکړه او له مووسسو یې وغوښتل چې د ټولنې باور وساتي، مرستې په رڼو پروسو ترسره کړي او پر اغېزمنو پروژو یې ولګوي. نوموړي د مووسسو څخه وغوښتل چې په کندهار کې د تلپاتې او اغېزناکو پروژو فعالیتونه لا زیات کړي.
د کرنې وزارت مالي او اداري مرستیال مولوي آغاجان آخند (حاجي سالم) په خپلو خبرو کې ټینګار وکړ چې په کندهار کې دې تلپاتې او متوازنې پراختیا ته پام وشي او په ټولو ولسوالیو کې دې فعالیتونه ترسره شي. هغه همدارنګه د اصلاح شویو تخمونو، نیالګیو او څارویو واکسینونو په وېش کې د وزارت معیارونو رعایتولو اهمیت یاد کړ.
د موسسو استازو خپل فعالیتونه، لاسته راوړنې او راتلونکي پلانونه د وزارت له مرستیال او د کرنې رییس سره شریک کړل.
دا ناسته د همغږۍ او روڼتیا په موخه ترسره شوه، ترڅو په کندهار کې د کرنې او مالدارۍ په برخه کې دوامداره پرمختګ یقیني شي او مووسسې د خپلو پروژو لپاره د اړینو معیارونو پلي کولو ته ژمنې پاتې شي.