پکتیکا کې د چهارمغزو ځنګلونو د پراختیا په پار هڅې؛ قومي مشرانو سره غونډه وشوه
۳ تله ۱۴۰۳ه.ش
۲۱ رَبِیعُ الْأَوَّل ۱۴۴۶ه.ق
د پکتیکا د کرنې، اوبولګولو او مالدارۍ ریاست چارواکي وایي، چې په دې ولایت کې یې د چهارمغزو ځنګلونو د بیارغونې او پراختیا په موخه هڅې ګړندي کړي، چې په ترڅ کې یې له قومي مشرانو او اړوندو چاراکو سره د ځنګلونو د خوندیتوب په پار خبرې اترې کوي.
ددغو هلو ځلو په دوام د پکتیکا دکرنې ریاست چارواکو چهارباران ولسوالی ته د سفر په ترڅ کې ددې ولسوالی له ولسوال، سیمه ییزو چارواکو او قومي مشرانو سره د ځنګلونلو د خوندیتوب او پراختیا په پار خبرې اترې وکړې.
د پکتیکا دکرنې ریاست وایي، ددې ولایت د ځنګلونو د بیارغونې او پراختیا په پار هلې ځلې ډېروي، ځکه ځنګلونه له یوه پلوه چاپېريال پاک ساتي، د سېلابونو مخه نيسي او د وحشي ژوو کورونه په خپله غيږ کي لري او د بل پلوه د طبي بوټو په وده او نمو کي مهم رول لوبوي اوهم زموږ لپاره پاکه او تازه هوا برابروي. همدا راز ځنګلونه د ژوند ارزښت لرونکي اړتیاوې هم برابره وي، چې په ګڼو برخو لکه د سون لرګیو، ودانیزو چارو، د مېوو او نورو فرعي محصولاتو په توګه ترې کار اخېستل کیږي، چې دا ټول د انسانانو او وحشي حیواناتو د ژوند کولو لپاره خورا اړین دي.
