هلمند کې د انجې دودولو په پار ننداریزې کروندې جوړېږي
۲۷ وږی ۱۴۰۳ه.ش
۱۴ رَبِیعُ الْأَوَّل ۱۴۴۶ه.ق
په وروستیو کلونو کې د هېواد یو زیات شمېر کروندګرو د انجې یا هېنګ کرکېلې ته مخه کړې ده. د دوی په وینا، انجه یو طبي بوټی دی او په کرکېلې سره یې تر نورو کرنیزو محصولاتو ډېره ګټه کوي.
په همدې موخه د هلمند دکرنې، اوبولګولو او مالدارۍ ریاست د کرنې وزارت د پراختیایي بودیجې له لارې ددې ولایت د نادعلي او نهرسراج په ولسوالیو کې د انجې د کرکیلې دودلو په پار بزګرانو ته د انجې ۹۲ ننداریزې کروندې جوړوي.
د هلمند دکرنې ریاست چارواکي وایي، چې دغه ننداریزې کروندې د نشیې توکو د کرنې د بدیل په موخه او د بزګرو د تشویق په پار کرل کېږي، چې د سیمې نور بزګر به هم ورڅخه زده کړې ترلاسه او بیا به یې په خپلو ځمکو کې وکري.
انجه، هنګ یا آنغوزه د افغانستان د غوره طبي او صادراتي بوټو په ډله کې ده چې په دې وروستیو کلونو کې په هېواد کې کرکېلي وده کړې ده.
انجه یو طبي بوټی دى، چې د درملو په جوړولو کې ورڅخه کار اخیستل کېږي او د کورني بازار تر څنګ نړۍوالوالو بازارونو کې هم په لوړه بیه پلورل کېږي.
افغانستان یو غرنۍ هېواد دی، چې په پراخه کچه بېلابېل طبي بوټي او نباتات لري او دغه بوټې په دودیزه توګه هم د خلکو له خوا د یو شمېر ناروغیو د درملنۍ لپاره کارول کېږي.
