کندهار کې د غنمو۴۲ ننداریزې قطعې جوړیږي
۱ لړم ۱۳۹۸
د کرنې، اوبولګولو او مالدارۍ وزارت کندهار کې د غنمو ۴۲ ننداریزې قطعې جوړوی.
په همدې موخه د کندهار د کرنې ریاست له خوا د یادو ننداریزو قطعو د جوړولو په پار پر بزګرانو د غنمو اصلاح شوي تخمونه، کیمیاوي سره او د مقایسوي کښت په پار دوی ته سیمه ییز تخمونه هم وېشلي دي.
ددې برنامې په اساس په دې ولایت کې د غنمو د پرمختللو لارو چارو د ترویج په پار د غنمو ۴۲ ننداریزې قطعې جوړیږي.
د کندهار د کرنې ریاست وایي، چې دغنمو دغه ننداریزې قطعې د کتار په ډول په ازمایښتې بڼه کرل کیږي، چې موخه یې د بزګرانو عامه پوهاوی او د حاصلاتو زیاتوالی ده.
د غنمو په دغو ننداریزو قطعو کې بزګرانو ته د غنمو د پرمختللي کرکېلي او د کروندو د مناسبې پالنې لارې چارې هم ښودل کیږي.
