د ننګرهار دکرنې رییس؛ د ختیځ لبنیاتو وړتیا ۱۰ زره لیټرو ته لوړوو
۱۹ وږی ۱۴۰۳ه.ش
۶ رَبِیعُ الْأَوَّل ۱۴۴۶ه.ق
د ننګرهار د کرنې، اوبو لګولو او مالدارۍ رییس مولوي محمد ولي محسن چې د مالدارۍ خدمتونو او څارویو روغتیا امر ډاکتر محمد ضمیر بهسودي یې ملتیا کوله د ختیځ لبنیاتو فابریکي څخه د لیدني پر مهال وویل د ختیځ لبنیاتو فابریکه چې څو کاله وړاندې د ۱۰ زره لیټرو شېدو د پروسس او بسته بندۍ په ظرفیت جوړه شوې، هڅه کوو ۱۰ زره لیټرو ظرفیت ته یې ورسوو.
د ختیځ لبنیاتو فابریکي مدیر خالد خان نعمت د ختیځ لبنیاتو فابریکي ستونزې، لاسته راوړنې، راتلونکي پلانونه، وړاندیزونه او خپلې غوښتنې د کرنې رییس سره شریکې کړې.
خالد نعمت وویل ختیځ لبنیاتو فابریکه چې د ختیځ زون د مالدارانو دلبني محصولاتو د پروسس په پار جوړه شوې خو په اوس وخت کې په بازار کې بې کیفیته او پوډري شېدو د دوی مارکیټ کم رنګه کړي.
ښاغلي نعمت وویل که چېرته د دوی د بازار موندنې ستونزه حل شي نو سلګونه خلکو ته به د کار زمینه برابره کړي.نوموړي د ننګرهار دکرنې رياست څخه غوښتنه وکړه، چې يو ګډ پلاوي دې وټاکل شي ترڅو په بازار کې بې کیفیت لبني محصولات ارزيابي او مخنیوی یې وشي.
د ننګرهار د کرنې، اوبو لګولو او مالدارۍ رییس د ختیځ لبنیاتو مسؤلینو ته د هر راز همکارۍ ډاډ ورکړ.
ښاغلي محسن وویل هڅه کوي د اړوندو ادارو سره په همغږۍ ددې فابریکي د بازارموندنې ستونزې حل کړي.
