لوګر کې زرګونو مالدارانو سره د سایلیج جوړولو ماشینونو مرسته وشوه
۳ وږی ۱۴۰۳ه.ش
۲۰صَفَر المُظَفَّر ۱۴۴۶ه.ق
د لوګر دکرنې، اوبولګولو او مالدارۍ ریاست ددې ولایت د مالدارۍ برخې بډاینې، میکانیزه کولو او د مالدارانو د ملاتړ په موخه ددې ولایت په درېیو ولسوالیو کې پر زرګونو بزګرانو د یوملیون افغانیو په ارزښت د څارویو د خوراکي توکو «سایلج» جوړولو ماشینونه وېشلي دي.
د لوګر د کرنې، اوبولګولو او مالدارۍ ریاست چارواکي وایي، چې دغه ماشینونه، چې د افغانستان د راتلونکو نسلونو (اف،جي،اې) په همکارۍ چمتو شوي دي ددې ولایت د برکي برک، خوښۍ او څرخ ولسوالیو د مالدارانو پر ۴۰ ګروپونو وېشل شوي دي، چې نږدې څلور زره بزګران ترې ګټه پورته کوي.
د لوګر ولایت دکرنې ریاست چارواکو له برخمن شویو مالدارانو څخه وغوښتل، چې یادو ماشینونو څخه سالمه ګټه واخلي او د ناوړه اقلیمي شرایطو څخه یې وساتي او داړتیا پرمهال دې دمالدارنو دغوښتنې سره سم د دوی په اختیار کې ورکړي.
«سایلیج» د ژمي په موسم کې د څارویو شنه خوراکي توکي دي، چې مالداران کولای شي د اوړي په موسم کې له شنو وښو «سایلیج» جوړ او د ژمي په موسم کې یې خپلو څارویو ته ورکړي..
د لوګر دکرنې ریاست هلې ځلې کوي، چې ددې ولایت د مالدارۍ د پراختیا په پار مالدارانو ته اړینې اسانتیاوې برابرې کړې، ترڅو د بزګرانو او مالدارانو د عوایدو کچه لوړ او اقتصادي وضعیت یې ورسره ښه شي.
